نقدم لكم اكثر من قصيدة مكتوبة للرادود الملا مسلم الوائلي
القصيدة: كل حياتي كربلاء
أداء: مسلم الوائلي
كلمات: محمد البطحاوي
~
فوگ الالف جم سنه مر اعله طف حسين
هل يا شهر بالحزن متعوده تبجي العين
كل حياتي كربلاء
كل حياتي كربلاء
~~~~
مرت سنين اعله فگدك وانته ذاك حسين ذاك
ويه الزمن كلشي تغير وانته محد غيراك
تضحك الموتك رحتله وما ركض موتك وراك
كربله بصدرك خذتها وما انطيتلها گفاك
بكربله شگد صحت عطشان اريد الماي
عريان باقي صدگ ماكو عليك افياي
حسين مسلوب الرداء
كل حياتي كربلاء
~~
انته مختلفه قضيتك منتصر عالسيف نحرك
تنعبر كلها بسهوله وانته ما واحد يعبرك
ما نعد من الولاده من الخيم هسه عمرك
ندري عند الله شكبرها حافر حسين اليطشرك
يالطايح بنص غرب تحلالك الدمعه
ادعي الله صبح ومسه كل عمري الك انعه
انه عايش للرثاء
كل حياتي كربلاء
~~~~
كربله يسولفها جرحك تعبت كلمن حجاها
وطبعة الحافر بصدرك ماكو واحد ما بجاها
وزينب من الخيمه طلعت من المهر خالي اجاها
الباري گال افنيها لجلك شجاوبيته وعطلاها
يحسين خالد تظل شما طالت الأيام
والله الك كل وكت شگد خلق خدام
كلها تنصبلك عزاء
كل حياتي كربلاء
~~
الدنيه جانت كلها بيدك انطيتها وما خذت منها
انشوفك انطيت الله كلشي ومنت عليك بجفنها
الجان محد يدري بيها جدامك اصلن شرفنها
انته لو ما طحت بيها كربله محد سكنها
عايش اظل للحزن ما ابطل دموعي
من كثر لطمي الك نيشاني بضلوعي
نبجي اعله مسلوب الرداء
كل حياتي كربلاء
~~~~
بالحزن والدمعه خادم هيج اگضي وياك عامي
بنهر خيرك كلها تشرب يالمتت بالحومه ضامي
بأخر الدنيه من اسلم تسمع ادريبك سلامي
اجي محملك سوالف وجرحك يطشر كلامي
حاميني وانته الجرح واصل لحد راسك
ما اريد انه كل هوه الما شايل انفاسك
تدري ما نحمل جفاء
كل حياتي كربلاء
°°°°°°°°°°°°°°°°°°°°°°°°°°
القصيدة: طبوها الأسود
أداء : مسلم الوائلي
كلمات: علي السيلاوي
~~
هدوا والزلم طگت الراس براس
حي الله بالاكبر زوده ما ينقاس
خافوا من خزرته بحين بيهم غار
طگ ظهر بظهر وي الگمر عباس
زينب عمته تهلهل للاكبر والعزم شاله
الاكبر امه اتزامط بي ما واحد تدناله
گلها العمه ما اشوفن زلم بيهم
لو طبوا ملاحم من يلاگيهم
~
طبوها الأسود وگلبوا الحومه
يا حي الكلف بالايد جيدومه
يم عباس كلها ادنگ الفرسان
من غيضه الشجاع ايشگگ هدومه
من صرخاتها تفر گوم يشبه بالحرب حيدر
گصته ولو طگ عرج الغيض ما يبقه اثر للشر
ما يتگابل وظل يضحك عليهم
لو طبوا ملاحم من يلاگيهم
~
الشده تريد زلمه اللي يلاگيها
مو كلمن يگلك انه راعيها
لو مالت علي الأكبر يعدلها
والعباس گدها ولايگ عليها
هذا ابن الما رد الضيف كل الناس يعرفونه
من گد ما عالي ومهيوب حيدر ثاني يسمونه
تاهوا بالعرك وهو اليدليهم
لو طبوا ملاحم من يلاگيهم
~
هاشم بالحرب ما عدو العيله
شيالت ثگال وتعدل الميله
عباس ويه الأكبر ذوله ولد اسباع
العاداهم تورط لبسوا شيله
لعبوا فلك بالميدان والعسكر هزموا جيشه
فارسهم ويصيح دخيل بالشرده بخف الريشه
يستر الله لو رفت جفافيهم
لو طبوا ملاحم من يلاگيهم
~~~
من طبع الأسد ما يخطي بالصيده
مترهي اعله كيفه يسوي اليريده
شبل حسين گدها وعن الف ينعد
خيال الملاعب والحرب عيده
يا محله العباس بهاي بيهم عالشط شسوه
لو هيجي الخوه ولو لا تسوه اقرانه الخوه
اخوته حيته وهو يحييهم
لو طبوا ملاحم من يلاگيهم
°°°°°°°°°°°°°°°°°°°°°°°°°°°°°°
القصيدة: ما ينطيني گلبي
أداء: مسلم الوائلي
كلمات: محمد الغزي
~~~~
حسين يخويه الله وياك
حسين يخويه الله وياك
~~~
ما ينطيني گلبي اگعد يگل للفاگده اتگعدين
هم بوگه بگت روحي من نسوانكم يحسين
يراحه الكل گلب متعوب تعبت ام عمر خمسين
اگعدوا انشوفكم ونروح لا تمشون يالميتين
ما ظل شي ويخلص الليل
اگعدوا انشوفكم ونشيل
الله وياكم احنه انريد
وحگ ما نعتب الكم حيل
~
لحد يعتذر مني الرايدني صدگ ارتاح
اگعدوا النوم موش الكم أفه غثاكم الذباح
بس لجفوفكم متني وهسه بسوط متني اللاح
انطگيت وصحت حيهم محد عوفوا زينب صاح
وعلي مو نيتي اضوجكم
هذا الصاير ابتكم
جانن ذني مضمومات
بس هسه ارد اگعدكم
~~~
اول مره اجيت اعتاب ضني من اعتب اتگعدون
بس هسه ايست منكم احجي البيه ما تدرون
هاي ام عون ناس اتصيح وصاح الما يعرف ام عون
هاي ام عون ياهيه زينب بت علي يصيحون
مناوب صارت اليتعب
الثاني يصيح اسم زينب
طف كامل عرف اسمي
وكل السان بي جلب
~~~~
البعيد هواي يعذرني ما ظل حيل واوصله
هذا الصار بيه اليوم وهذا الجابته الغفله
اليوم اعثر وگومن آخ محد گالي اسم الله
من كون الكبار تموت جا گعدولي عبد الله
بلكت حي عبد يسمع
يگوم العمته يفزع
إلا وياي زلمه يگوم
يخوتي بهاي إلا ارجع
~~
عله بگلبي خله النوم وكت خله اخوتي ينامون
غريبه من نمت يا حيف همه بحالي ما يدرون
اسوي الما محسبه يصير اخافن اخوتي يزعلون
منكم كون محد گام وحگك ماشيه انده جون
لحد ينهظم مني
كلشي اليوم تعبني
يخوتي الصبح راح يصير
هلبت واحد يسمعني
°°°°°°°°°°°°°°°°°°°°°°°°°°°°°°
القصيدة: ادور عليك
أداء: مسلم الوائلي
كلمات: اسامه الفيروز
~~
گادتني روحي الجثتك من وگفت الخيل
.. آه يحسين يا بويه
..آه يحسين يا بويه
~~~
ما اندل ودور عليك محد گال عنك ذاك
كلها تريد ما اشوفك ولا واحد علي دناك
قميصك شلته من الگاع ظليت انته وين الگاك
اشمن ريحتك ماهي عطرك ذابحينه وياك
ثاريك اگبالي وگمت ما اعرفك
نازف ويابس حدر جسمك نزفك
~~
گلت الگاك بس كبران لو من فرگه متغير
ومثل الناس التشيب بته تگوده من يكبر
مثل ما دار وكتي وياي جا كون الوكت يفتر
وترد لخيامنه وتعيش انه انذبح وانته ازغر
اوصلك واشرد يخوفني الدم
بيا وكت اصرخ يمك وما تهتم
~
گوم وياي رجعني بعيده اخيامنه عليه
ما اگل البناتك مات اگلهن يجي العصريه
اشرب ماي يله اتموت الك ضميتلي شويه
اذا زعلان عالباگوه اجيبن هسه ترجيه
حاجيني مية مره عدت البابه
گلبي وگف يا علته وصوابه
~~~~
احركنك واطيح عليك ساكت وانه الأتلجم
انه جفوف اديه ازغار يترسهن وزيح الدم
لا تنشبگ لا تنشال لا تنعاف لا تلم
هو الموت بالفرگه المات من التعب يسلم
انده واصيح وما اتحرك گلبك
ايست كلش راح اموتن يمك
°°°°°°°°°°°°°°°°°°°°°°°°°°°°°
القصيدة: الباقر (رحلة عذابي )
أداء: مسلم الوائلي
كلمات: علي أكبر الغرابي
~~~~
اليرسمني صورة بخياله ويشوف الباقر
يلگاني دمعه اعله دمعه بهذاك العاشر
الرايد جوابي .. ويعرف مصابي
رحلة عذابي .. من كربله
~
للينشدني كون بخير
عن يا خير وشلونه
انه ابن الحرگوا اخيامه
ورماد النار بعيونه
انه ابن الماله فزعه وراي
وزراگ السوط بمتونه
انه الماله عرف بالشام
وانه الكلهم يشتمونه
انه الماله بيرغ فزعله وگرابه
وبنات النبوه تلمهن خرابه
ذيج الخرابه وصورها تعيش ابالي
وشهگت رقيه شفتها اعله راس الغالي
اليسمع عتابي .. ويعرف مصابي
رحلة عذابي .. من كربله
~~~
انه العاش بظهر عاشور
وعمامه اگباله مذبوحه
انه الماشي ويه راس حسين
من جروحه لجروحه
انه ابن الماله شربت ماي
وفاضت بالعطش روحه
انه الحامه اعله خدره وخاف
عين الشامت اتلوحه
شفت صورة صورة بهذيج الظهيره
وكت والله جدي نشيعه بحصيره
واليصعب اكثر علينه والمبجينه
شفنه اليسلب خيمنه يشتم بينه
والدم خضابي .. ويعرف مصابي
رحلة عذابي .. من كربله
~~
ما بين الخيم والنار
وبين الباگوا احلامي
افك من هاي اطيح بهاي
والگه الخيل جدامي
وركضنه اندور اعله حسين
ضامي يصبر بضامي
وصوت من الخدر لحسين
خويه احترگت اخيامي
عله التل تحشمه بهذيج المشاعر
ويگوم ويطيح اعله وجهه ويكابر
ما بين اخوها وخيمها شفتها احتارت
بين اليتامه التلمها وعليها اندارت
اليبجي اعله بابي .. ويعرف مصابي
رحلة عذابي .. من كربله
~
زجر ما خله عدنه امتون
ما تنزف ولا تدّي
وعله اعناد العطاشه يگوم
يترس ماي ويبدي
ويجرنه ويضحك الحداي
ويگل الزينب اتعودي
الأول من يطيح انطيح
شسوه بحالنه اليحدي
اعله رايه مشينه وگعدنه اعله رايه
الينشده علينه يگول السبايه
يالخارجيه اعله زينب يصيح الحادي
ولا شفنه واحد يسكته وضميره ينادي
اليرسم شبابي .. ويعرف مصابي
رحلة عذابي .. من كربله
~~~
رغم ما عمري خمس سنين
بس الشفته بالعاشر
ما يگدر يرسمه انسان
مهما حاول يسافر
ياهو المثلي شاف حسين
ملعب صدره للحافر
وياهو المثلي شاف شلون
من ظل وحده وحاير
غريبه حياتي العشتها غريبه
مصيبه وبعدها تصح يا مصيبه
ذيج المصيبه شفتها تعيش بروحي
الرايد جوابي يشوفه بدمعتي ونوحي
اليقره بكتابي .. ويعرف مصابي
رحلة عذابي .. من كربله
°°°°°°°°°°°°°°°°°°°°°°°°°°°°°°
القصيدة: مات علي
أداء: مسلم الوائلي وعلي الوائلي
كلمات: علي مالك الموسوي
~~
يا بويه علي .. يا روحي علي
وليدي علي .. گلبي علي
~~~
گوم علي ...
مو تدري الحسين يگوم ويطيح
گوم علي ...
بعدك ظل ابوك اتلولحه الريح
گوم علي ...
حته الذابحك من شافني يصيح
گوم علي ...
تعال عليك ذيج ايامي وسنيني
بس احجايه وحده وليدي حاجيني
بويه اكسر الخاطر باوع الروحي
هم مشلوع گلبي وهم تبجيني
لحگوا اعله گلب حسين جتاله منه
تدري الأبو المخنوگ يتنخه ببنه
خليني اموت وياك يا عز دلالي
متعيني شوف حسين ظل خالي حضنه
~~~~
آخ علي ...
هاي الآخ شلعت گلب الحسين
آخ علي ...
كتلت روحها عليك النساوين
آخ علي ...
امك راكضه وتنطي الوجه وين
آخ علي ...
شلتك ونثلم نحرك وشلت ايدي
صحت الله ولحد مردوا اوليدي
ما خلوني احبه وسحگوا ضلوعه
وادري بخيلهم متعنيه لوريدي
شوف انه بويه شراح تلتم عليه
بس مو مثل فرگاك شيسوي بيه
جا هسه گوم وياي خليني اشبگك
خافن بعد ساعات ماهنه اديه
~~~
مات علي ...
هاي السالفه الما اشوفها اطيب
مات علي ...
وبگلب الحسين اتربع الشيب
مات علي ...
حته اخيام زينب صارت اثغيب
مات علي ...
راح اگضيها بويه اركاض تدريني
حضني اعله الولد كلش اموازيني
بس لو اموت لو تعميهن عيوني
صار الشوف كلش مو حلو بعيني
كل حيلي راح وياك وعيونك انته
جان الحسين بخير انته الكتلته
ربيتك ومهظوم وبضيمي حاير
مو حيلي لا كل بيت هاشم هدمته
~~
عيوني علي ...
لمن غمضت صاحوا كتلناه
عيوني علي ...
گلب حسين بوليده شلعناه
عيوني علي ...
نام حسين طول بطول وياه
عيوني علي ...
گوم الخاطر العباس وعيونه
ليش اوليدي ابن گلبي تذبحونه
كلهم داروا عليك بطرگ روحك
مو بس ذبحه شيسوون بمتونه
صحت امك اتمنيت ما گابلتني
گعد علي وخينام ومحضره حضني
ونده وفز وياك ونده وحاجيك
وما تقتنع لو اگول ما يگعد ابني
~
ليش علي ...
تدري امك بعد بيها دللول
ليش علي ...
يا جلاب گلبي ويا حلو الطول
ليش علي ...
هاي النعمه تطشر بالخيول
ليش علي ...
گوه ارد اكض گلبي وما يخليني
علي عليك الحسين وشيبي حاجيني
ما يگعد وليدك تسحن بروحه
خنگه اجيبني وخنگه توديني
حته الله بويه وياك ما سمعتني
ومشيب ومهظوم بعدك عفتني
مديت اديه وجان كل قصدي احشمك
ورد گلبي والجفين من رجعتني
°°°°°°°°°°°°°°°°°°°°°°°°°°°°°°°
القصيدة: بديت اتعب
أداء: مسلم الوائلي
كلمات: محمد الغزي
~
بديت اتعب .. بديت اتعب
علي شوف وظهر حدب
بديت اتعب .. بديت اتعب
شلع گلبي الولد زينب
عاشرني مو بس ولد والعشره ما كملت
كاتلني زينب علي من اتعذراني وسكت
يا بويه گتله وشهگ وبسكته روحي بجت
بليل يا ابو علي وحسين من صبحت
الغبشت روحه بأبنك مات يا زينب شنهي يتمنه
اليفك ريجه بوداع وليد البواجي شويه وي حزنه
رحتله بروح تعبانه
علي ابني ويا علي يبني
علي ولا حرك السانه
علي ابني ويا علي يبني
حرت ويا اشيله امنين هواي جروح واحنه اثنين
گتله براحتك شتگول عوف البويه گول حسين
علي يا بويه ابوك انه
~
صفه حزني .. صفه حزني
ما تعبني عذبني
صفه حزني .. صفه حزني
يزينب هذا تالي ابني
يا زينب المشكله للفرگه ماكو دوه
تعبني كلش علي گلبي عليه انجوه
التعب بهالعمر مو خوش عمره گضه
گتله ارد اجرن نفس ما لحگت اتعب سوه
شويه شويه يبني وياي گلتله ارتاح اريد ارتاح
من حسين يخت حسين علي الأكبر يزينب راح
شسوي العلي گليلي
علي ابني ويا علي يبني
ما يلم سهر ليلي
علي ابني ويا علي يبني
الهظمني يختي مو جي مات كسرني بديرت الشمات
ندهته بحجت الله وياك ما گاملي ورد مات
وتبده الحيل من حيلي
~
تحملته .. تحملته
يزينب شده سالفته
تحملته .. تحملته
يضيم الينهظم سكته
بعيوني من سولفت هزيته هزت مهد
بالموت هم دللت گتله اگعد وما گعد
ما خله راي الولد يا زينب شسوه بعد
هين يضيم الزلم وآحا يضيم الولد
يبني يبني الشلته يوم وعزيز ويا بعد گلبي
بكثر عمري الگضيته بخير تعثرت لعلي بدربي
صارت گبل حته اسكت
علي ابني ويا علي يبني
مات ودللت ميت
علي ابني ويا علي يبني
انشدي شلون جابوني تهت وخواني دلوني
مكابر كابرت يمه لحد ما ملن عيوني
دللول الولد صبن هالعيون
~
اريدن حل .. اريدن حل
كلشي بدنيتي اتبدل
اريدن حل .. اريدن حل
اليدري بحالي لا يسئل
حل للصبر دورت ملاني حته الصبر
حيرني بكربله حيرت امضيع ستر
هالشيب كله علي هالشيب مو من كبر
بويه شحلاته الصبح بس ما حجاها الظهر
جنه اثنين انه وياه وحيد وكتي خلاني
من الف هنياله لمن مات بس شيموت الثاني
كثرهن علي همومي
علي ابني ويا علي يبني
گرب يومه وبطه يومي
علي ابني ويا علي يبني
ما خلالي شي من طاح كتلني الحگني لمن صاح
بعد طايل يعمري المن غير يخلصك الذباح
حزن وتعده لرسومي
~~~
يتعب ايده .. يتعب ايده
اليتاني ابنادم ايريده
يتعب ايده .. يتعب ايده
اله الله اليوجعه وليده
يا جفي بسك بعد جندوب من تنفرك
اصبر بروحك جذب تبدي ويه روحك عرك
تدركني الميت تجي من يطيح ما تنترك
بكل موته يرضه وعلي اليتعب وينترك
رضيت بكلشي اموت اليوم علي من اتحيرت يمه
سيف بحافر من الماي بس لا اموتلي بلجمه
بيه توسلت كلش
علي ابني ويا علي يبني
خفت لا خبر موته يطش
علي ابني ويا علي يبني
شلع گلبي الولد من نام لا انه الميت ولا گام
وادم عينها اعله حسين محضرتله حجر وسهام
عله وليدي الگلب موحوش
°°°°°°°°°°°°°°°°°°°°°°°°°°°°°
القصيدة: سلام الله على جروحك
أداء: مسلم الوائلي
كلمات: علي أكبر الغرابي
~~~~
حسين يبن فاطمة
حسين يبن فاطمة
حسين .. حسين
~~~
اذوب بمجلسك يحسين
وعابس ينولد بيه
جنون بلا منافس صار
دمعتي بكل حسينيه
العاشگ من صدگ مولاي
نعرفه من بواجيه
اجيت وكلي دمعه عليك
وشعار جفوفي لطميه
~~~~
غايب حاضر انشوفه
الخادم لو خلص عمره
وباجر بالحشر نلگاه
صاحب موكب اشكبره
يمالك كل جرح بيه
حبيتك على الفطره
من اطب المجلسك يحسين
اشمن ريحة الزهره
~~~~
رسمتك صوره بس مذبوح
وجرحك ما وگف نزفه
لذلك كل صبح عاشور
اطبر راسي واتحفه
سلام الله على جروحك
يجرحي الما قبل يشفه
اليخدمك كل وكت مهيوب
خدمتك عافيه وعفه
~~
يحسدونه عليك هواي
وحگهم من يحسدونه
منو مثلك وإله الكون
خالق كلشي لعيونه
المجنون بمحبتك صار
عاقل من يسمونه
وقانون العشگ مرخوص
بس لجلك يعرفونه
~~~~
تسامحني ردت مولاي
اذا ما كفت حروفي
البايع روحه حته انعيش
شنقدم له ما نوفي
اذا وسط الگبر يحسين
خلوني وبده خوفي
واذا منكر سألني عليك
تشهد لطمة جفوفي
°°°°°°°°°°°°°°°°°°°°°°°°°°°°°°°
القصيدة: درس الخدمة
أداء: مسلم الوائلي
كلمات: كرار صباح الكاظمي
~~~
عزها الخدامه ويا صاح اتواضع شما تكبر
~~~~
عز خدمتك يالخدمتك متصدره
شمحلاها خادم تصح لأبن الزهره
صم اذنك واحفر البير بأبره
لا تسمع لهذا وذاك الدونك يريدك تخسر
~~
ايدك الناسك ها يا صاحب مدها
وناس التبلي والتنافق ردها
خل عينك تشوف وأذانك سدها
صادق الصادق من گال عينك دليل ومصدر
~~~
من تنحسب خادم بدرب الخدمه
احفظ النعمه لا تزول النعمه
والشان ما ينشره حسين يقدمه
بالمال ما تكسب شان الشان ثوب مگدر
~~~~
من يزل مؤمن ينحمل للسبعين
والخادم اشمر زلته بجيس حسين
تربات مجلس صير بالخد وعين
خلي اليريد ايسميك لو بالذهب لو جوهر
~~~
المؤمن اللي يستر عيوب الناس
عوف النميمه الغيبه ما ترفع راس
حسين انسانيته جانت نوماس
واحنه انحسبنه اعله حسين بكل فرد بي نفخر
~~~~
خيمه وجبيره وبيها يعلالك شان
ادخلها بسم حسين واسم الرحمان
لفلان لا تهتم تره نفسه افلان
متستر بأسم حسين وبكل درب يتعثر
~~~~
حسين للخادم تره مفصل ثوب
وبدفتر الزهره اتسجل مهيوب
مو للرياء حسين والكله اذنوب
الدر والفحم ما ينقاس لا تنخدع بالمظهر
°°°°°°°°°°°°°°°°°°°°°°°°°°°°°°
القصيدة: بجيت بحضرتك دم
أداء: مسلم الوائلي
كلمات: محمد رسول الحميري
~
بجيت بحضرتك دم
يم شباجك التم
يم غيرك بجيت وعيروني
عم و والد وخل
انته الكل بالكل
جي خادم جنابك قدروني
يعافيتي ... يحنيتي
يتربيتي ... يبو الأكبر
~~~
سويت الخدم قدوه
دونك كلشي ما نسوه
فدوه الشيبتك فدوه
.. تحيه السيدي
يواحد ما الك ثاني
ماخذ عگلي ولساني
اني وافتخر اني
.. عزائك مولدي
يوالدنه يقائدنه حبيب الله وحبيبي
يتاليتي الك صيتي واحس دربك نصيبي
شفتك من بده الطف
واگف بأخر الصف
وتگلهم اريد الينصروني
منها ودمعي ما كف
جدمي النصرتك خف
مجنون وصرت عاشگ جنوني
على نيتي ... يحنيتي
يتربيتي ... يبو الأكبر
~~
تنطي الكل بشر فرصه
ظلت كلمن وحرصه
عيب الرافگك ينصه
.. مقامك بالسمه
امام مربع بصدري
تدري بشيعتك تدري
سموك الهوه العذري
.. يريحة فاطمه
تهم بينه يراعينه يبو عيون الحنينه
تلگانه يمولانه يبن تاج المدينه
ضگنه بعشگك المر
محد يفهم السر
نهواك وعذابك عدنه راحه
انته مأسس الحب
دمعي اگبالك يصب
ليش بحضرتك تحله المناحه
يتاليتي ... يحنيتي
يتربيتي ... يبو الأكبر
~~
اخذ من كل گلب نصه
خلي العترتك حصه
عشت وياكم بقصه
.. ليوم الأخره
اخذني الحضنك الدافي
أرجع منه متعافي
تاج الراس اليوافي
.. أحن لمسامره
هله بخلي هله بكلي هله بشيخ العشيره
عشت بيه نفس ريه امير ابن الأميره
يمك يوگف العد
شفتك مالك احد
نخلص وانته بعدك بالبدايه
جدي الخدمتك هب
أب يسلمك الأب
انته الورثت للشيعه رايه
حرز بيتي ... يحنيتي
يتربيتي ... يبو الأكبر
~~~~
ضمني مروتك ضمني
اخاف الدنيه تهظمني
خمني شما ردت خمني
.. واخذني العالمك
دنيه شما عشت بيها
ادري الفرگه تاليها
راح انذرها ونطيها
.. واروحن فدوه الك
تشاركني يمالكني وجودك سر وجودي
عبد خلني تقبلني يمذبوح اعلمودي
مر اعله الگلب مر
حر وتعشگ الحر
وينك يا حنين الله وحنيني
حرز برگبتي انشد
ضمك گلبي ونسد
وحدك تارس عيوني ويميني
يتضحيتي ... يحنيتي
يتربيتي ... يبو الأكبر
~~~
حملي بصحنك اطيحه
گلبي الخايف اتريحه
تبدي بعاشرك صيحه
.. ذبيح ومنتصر
عزائك فاطمه اتقيمه
جرحك الله اليديمه
يالمنطي الخدم قيمه
.. عطائك مستمر
يثار الله الك صلى ضميري بكل طهاره
عشت يمي وسط دمي الك گبه ومناره
گلبي من العشگ جن
حن الشوفتك حن
مدمن شوفتك من الطفوله
عقلي اختارك وبس
حس بغربتك حس
واحد علم الدنيه الرجوله
نفس ريتي ... يحنيتي
يتربيتي ... يبو الأكبر
°°°°°°°°°°°°°°°°°°°°°°°°°°°°°°
القصيدة: ابن گلبي
أداء: مسلم الوائلي
كلمات: علي مالك الموسوي
~~~~
يا بويه علي ... يا روحي علي
~~~~
گوم علي ...
مو تدري الحسين يگوم ويطيح
گوم علي ...
بعدك ظل ابوك اتلولحه الريح
گوم علي ...
حته الذابحك من شافني يصيح
گوم علي ...
تعال عليك ذيج ايامي وسنيني
بس احجايه وحده وليدي حاجيني
بويه اكسر الخاطر باوع الروحي
هم مشلوع گلبي وهم تبجيني
لحگوا اعله گلب حسين جتاله منه
تدري الأبو المخنوگ يتنخه ببنه
خليني اموت وياك يا عز دلالي
متعيني شوف حسين ظل خالي حضنه
~~~~
آخ علي ...
هاي الآخ شلعت گلب الحسين
آخ علي ...
كتلت روحها عليك النساوين
آخ علي ...
امك راكضه وتنطي الوجه وين
آخ علي ...
شلتك ونثلم نحرك وشلت ايدي
صحت الله ولحد مردوا اوليدي
ما خلوني احبه وسحگوا ضلوعه
وادري بخيلهم متعنيه لوريدي
شوف انه بويه شراح تلتم عليه
بس مو مثل فرگاك شمسوي بيه
جا هسه گوم وياي خليني اشبگك
خافن بعد ساعات ماهنه اديه
~
مات علي ...
هاي السالفه الما اشوفها اطيب
مات علي ...
وبگلب الحسين اتربع الشيب
مات علي ...
حته اخيام زينب گبت اثغيب
مات علي ...
راح اگضيها بويه اركاض تدريني
حضني اعله الولد كلش اموازيني
بس لو اموت لو تعميهن عيوني
صار الشوف كلش مو حلو بعيني
كل حيلي راح وياك وعيونك انته
جان الحسين بخير انته الكتلته
ربيتك ومهظوم وبضيمي حاير
مو حيلي لا كل بيت هاشم هدمته
~~~
ليش علي ...
تدري امك بعد بيها دللول
ليش علي ...
يا جلاب گلبي ويا حلو الطول
ليش علي ...
هاي النعمه تطشر بالخيول
ليش علي ...
گوم الخاطر العباس وعيونه
ولكم ليش ابن گلبي تذبحونه
كلهم داروا عليك بطرگ روحك
مو بس ذابحه وشمسوي بمتونه
حته الله بويه وياك ما سمعتني
ومشيب ومهظوم بعدك عفتني
مديت اديه وجان كل قصدي احضنك
ورد گلبي والجفين من رجعتني
°°°°°°°°°°°°°°°°°°°°°°°°°°°°°°°
القصيدة: احسبها ورقة وقلم
أداء: مسلم الوائلي
كلمات: علي البو حمد الموسوي
~~
من هذا المجلس كون تحسب للعاشر
لحسين شراح تكون ناصر لو حافر
التوبه لحظة ندم
احسبها ورقة وقلم
ناصر لو حافر .. ناصر لو حافر
~
بصراحه فرصه الخدامه نعمه اليجيها لازم ينافس
الحجه اعله نقصه توثق اسمه بسجل حضور المجالس
بروايه من الإمام الصادق اكتبها
يسولف وي فضيل بعقلك احسبها
تحضرون بمجالس بيها ذكر حسين
نعم هاي المجالس كلش انحبها
لو ردت اتوفي الدين دني الحب صوبك
وكون اتحضر لحسين گلبك مو ثوبك
اطلع من العدم
احسبها ورقة وقلم
ناصر لو حافر .. ناصر لو حافر
~
روه المظفر روايه صعبه واحسها اخطر روايه
اليوالي جعفر ينظفه گلبه ويدگ وتد للهدايه
المظفر ينقل اسمع من صدگ واحذر
ذنبك ينحسب خله بأدب جعفر
هظيمه الخادم يخالف امر مولاه
ما اوصيك اعرفك تربية منبر
ينقل زيد الشحام هاي ويرويها
كون افعال الخدام نتفاخر بيها
وتنحسب عالخدم
احسبها ورقة وقلم
ناصر لو حافر .. ناصر لو حافر
~
الحجي السمعته انسحبله خطوه واخذ قرار بوثاقه
السهم رجعته تزيده قوه لأن وراهه انطلاقه
ارجع خطوه ما دام الضعن قادم
وهنياله اليرد من الذنب نادم
الإمام الصادق يريد الخدم خوان
اليطعن بالخدم ما ينحسب خادم
زيناً وصاك اتصير ويريدك تنصح
وتصير شلون البير تستر ما تفضح
خلي موطئ قدم
احسبها ورقة وقلم
ناصر لو حافر .. ناصر لو حافر
~~
محبوبي يدري ولو گتله نادم يقبلني ينطيني ايده
جا شنهو عذري لو اني خادم وذنوبي سيف بوريده
امامي يريد احاسب روحي يوميه
شگله الما تحبهن للأسف بيه
يمته احسب الخطواتي اعله حب مولاي
مثل ما بالزياره الأربعينيه
عالمجلس الله انطاك نعمه اتداريها
هاي النعمه الأملاك تتبرك بيها
ال لا گبرها ال نعم
احسبها ورقة وقلم
ناصر لو حافر .. ناصر لو حافر
~~
الصادق كلامه من اطبقه اربح يحسبني عالجعفريه
معنه الخدامه الحب والتسامح هذا التريده الزجيه
ارفع ايدك وعهد العشگ وقعه
وشنو ايغيض الإمام بداخلك طلعه
المآتم نعمه عنها شگالت الزهراء
ادور بالمجالس مثل المضيعه
الخدمه اتريدك محروگ والعالي اتلوحه
واليتبع ممشه النوگ يتدارك روحه
ويفهم الما فهم
احسبها ورقة وقلم
ناصر لو حافر .. ناصر لو حافر
°°°°°°°°°°°°°°°°°°°°°°°°°°°°°
القصيدة: أخر نظره
أداء: مسلم الوائلي
كلمات: علي الأكبر الغرابي
~~~
أخر نظره ...
جانت بين النار وبيني
آخر نظره ...
وتراوالي اخيام حسيني
من حرگوا باب الدار
ظليت احجي ويه النار
أخر نظره .. أخر نظره
~
حرامات صحت من احترگ بيتك
وتغير لون عافيتك
وعثر دخانها بريتك
حرامات .. حرامات
سلامات نفس يدفع نفس بيه
وخفت لا لاگي علويه
بهذيج النار مجويه
سلامات .. سلامات
جم علويه اللاذت بيه
خلصت روحي شويه شويه
اول مره ...
جني بذاك الموقف حاضر
اول مره ...
عشت الطف وجروح العاشر
وبالصادق مدري اشصار
ظليت احجي ويه النار
أخر نظره .. أخر نظره
~~~~
من الزغار لگيت النار تتبده
وجرح شايل جرح بعده
اضم وحده تعثر وحده
من الزغار .. من الزغار
على النار ذكرت الحرگوا اخيامه
بظهر عاشور گدامه
ولا بي فزعه لأيتامه
على النار .. على النار
والخيماته كل نظراته
مات وعينه اعله ابنياته
ما بي فزعه ...
ولا بي يوگف من اسهامه
ما بي فزعه ...
خاطر يمشي ويطفي اخيامه
ومن شفت حسين احتار
ظليت احجي ويه النار
أخر نظره .. أخر نظره
~~
بلا روح اليضيع من التعب لونه
وتفرهد كل حجي عيونه
لحد يسئل شلونه
بلا روح .. بلا روح
بالجروح صحت بس ما شفت فزعه
ويه صوت الوادم اتسمعه
طحت دمعه بأثر دمعه
بالجروح .. بالجروح
وتراوالي الشاغل بالي
من ظل وحده حسين الغالي
مثل حسيني ...
ظليت الوحدي بهل الحاله
مثل حسيني ...
بس ما سحگتني الخياله
ولا حافر بيه اندار
ظليت احجي ويه النار
أخر نظره .. أخر نظره
~
بالأحلام اسافر ولگه بحلامي
جرح اخضر لجن ضامي
وشفت عاشور گدامي
بالأحلام .. بالأحلام
بلا اخيام حراير كل بني هاشم
وراهن تركض الوادم
وبنات العفه مو لازم
بلا اخيام .. بلا اخيام
گمت اتخيل زينب عالتل
يا مذبوحي اتگله ويخجل
يا مذبوحي ...
من گالتله اخيامك حمره
يا مذبوحي ...
مره يگوم ويوگع مره
ومن هذا الموقف دار
ظليت احجي ويه النار
أخر نظره .. أخر نظره
°°°°°°°°°°°°°°°°°°°°°°°°°°°°°
القصيدة: افرح اخدمك
أداء: مسلم الوائلي
كلمات: ابو حميدة الشويلي
~~~
حبيبي حسين .. حبيبي حسين
~~
گالولي ما توصل اله صعبه بهذن اذنوبك
ايس ولا تحجي بعشگ شيوصلك المحبوبك
عوف التوسل والبجي ما تلگه شي بدروبك
ولا تكتب اشعار وندم تلگاه وهم مكتوبك
شعليه بيهم وجهي بس الك درته
ما عندي غيرك انه ليه بس انته
جيت بعزائك طعم رحمتك ضگته
گلتلهم انه عندي حسين
بكل حاله اجيله يگلي تعال
ذنبي يمسحه وادري حنين
شابع هظيمه وينطي دلال
~~~
الوادم يمر بيها العشگ وتخسره ميظل دايم
بس عشگك الما ينخسر خل يفهم الما فاهم
العايش عليك بدنيته جان برحمتك حالم
ما يلتفت لأكبر بشر الصار بجمالك هايم
هيمني حبك جلمة گلبي احجيها
الغيرك حبيبي تحرم ان اوديها
شما روحي ضاعت مصابك يجر بيها
واعدتك انه وگلبي يصيح
غير الحسين شعندي حبيب
افرح اخدمك تالي اگول
هيه مصيبه وانته غريب
~
حب ثاني ما حب الگلب بس انته لتملكته
وما عندي غيرك لو گلت صدگني مالي إلا انته
جم حايط ذنوب وهجر وسط الگلب هدمته
وطعم العسل يم خدمتك مر سيدي من ضگته
حبيبي انته وماكو للگلب غيرك
انه ودمعتي نعيش بفضل خيرك
لگيتك الي عش عطف وانه طيرك
كسره جناحي خله يعيب
عن لا يطير وينسه هواك
سويني بين الوادم غريب
يالباقي وحدك محد اجاك
~~
انه ودمعتي الي تصب ما النه غير عيونك
ولا عدنه شي بي نلتهي بس البجي اعله ضعونك
مادام انه بروحي نفس للموت اظل مديونك
ما اعوفك بظهري يمن كل خيري من ماعونك
عهدي كتبته وابقه عالعهد خادم
بحبك إلتزم وبفضل گمر هاشم
اخدم واحب ما عليه بالوادم
من الدنيه كلها امشي واروح
والكربلائك انوي الرحيل
ولمن تضكني الدنيه اصيح
انه الحسين الگلبي كفيل
~~~~
الله يعين العافتك فوگ الترب من راحت
العاشت عمرها مدلله عالناگه تدري شصاحت
بويه حسين امروتك لطمت وجهه وطاحت
وكبرت رقيه من الهظم بجفاك گد ما ناحت
رقيه بنتك هظمها الحبل ويلي
صاحت يبويه اليسر هدم حيلي
بس گلي يمته اشوفك اتناغيلي
يا بويه درب اليسر عذاب
وانه اعله اديك امعوده انام
نومي بفرگتك عله التراب
لا عندي والي ولا لي خيام
