كلمات قصيدة اخر امنيه مسلم الوائلي مكتوبة كاملة
قصيدة | آخر أمنية
أداء | مسلم الوائلي
كلمات | علي الأكبر الغرابي
°°°°°°°°
جانت آخر امنيه ابيناتنه
الموت ياخذ روحنه اثنيناتنه
ولو كسر فيه العمر .. گبر وبصفه گبر
امنيه اثنيناتنه .. امنيه اثنيناتنه
°°°°°°°°
واحد سولف الواحد
عن امنيته وشرايد
وخلينه الدمع شاهد .. علينه
انه وفاطمه الزهره
واليوجعنه والعشره
صغنه من الألم ذكره .. بدينه
سلامات ...
عليِ لا تخفي موضوعج سلامات
عزيزات ...
يبعد العافيه دموعج عزيزات
علي مات ...
منهد ما كسروا ضلوعج علي مات
صرت اگلها واعثر بجلماتي
العذر لله وليج يا مولاتي
وامنيه بعد العذر .. گبر وبصفه گبر
امنيه اثنيناتنه .. امنيه اثنيناتنه
°°°°°°°°
بين االشهگه والشهگه
وبين احساسي بالفرگه
تذبح واهس الملگه .. صفنتي
مثل الشمعه گمت اذبل
وهيه اتگلي لا تزعل
فدوه العينك التخجل .. دمعتي
طفه البيت ...
منهد ما شال راعيه طفه البيت
وتبديت ...
نفس يم باب كل ريه تبديت
وتمنيت ...
يرد ذاكه الزمن بيه تمنيت
هذا حالي للنشد عن حالي
الشيب تارس حته رمش اخيالي
ورغم كل هذا انتظر .. گبر وبصفه گبر
امنيه اثنيناتنه .. امنيه اثنيناتنه
°°°°°°°°
كلمن سولف برايه
وكلمن دمعته ولايه
وجانت آخر احجايه .. حجتها
باجر يا علي شلونك
لو باگ الهجر لونك
الله يساعد عيونك .. وكتها
يبو اتراب ...
متت من صاحت الزهره يبو اتراب
عله الباب ...
عفتلك يا علي ذكره عله الباب
ولا طاب ...
ضلعي ولا برد كسره ولا طاب
جانت آخر امنيات دموعي
كون يندار الوجع بضلوعي
وكون من بعد الكسر .. گبر وبصفه گبر
امنيه اثنيناتنه .. امنيه اثنيناتنه
°°°°°°°°
وجه المغرب ولونه
للسالفته بعيونه
ليل الفاگد شلونه .. مصيبه
الما ماتت سوالفها
ودوم بروحي شايفها
تمسح دمعتي بجفها .. الحبيبه
يگولون ...
من طبع اليحب يندل يگولون
بالعيون ...
كلما صرنه نتأمل بالعيون
حلم كون ...
اموت وياها لو تقبل حلم كون
وسولفتلي الزهره بس بعيونها
لأن جان التعب ماخذ لونها
يا علي بعد الصبر .. گبر وبصفه گبر
امنيه اثنيناتنه .. امنيه اثنيناتنه
°°°°°°°°
شويه شويه احس بيها
تبرد كل محاجيها
وبين من بواجيها .. هجرها
من عدها وبديت اشعر
بالگوه النفس يعبر
وحسيت الدمع يجبر .. كسرها
شجه الموت ...
واخذ من عندي غاليتي شجه الموت
بلا صوت ...
دفنت احلامي وام بيتي بلا صوت
سوه انموت ...
انه الجانت امنيتي سوه انموت
انه من يوم الدفنت الغاليه
الدار وشما بيها وحشه وخاليه
والهجر آخ الهجر .. گبر وبصفه گبر
امنيه اثنيناتنه .. امنيه اثنيناتنه
°°°°°°°°
