كلمات قصيدة شمتاني خلك مايرد مسلم الوائلي مكتوبه كامله
قصيدة | شمتاني خلك مايرد
أداء | مسلم الوائلي
كلمات | علي أكبر الغرابي
_____
على خدود الرمل كاتب الك ذكره ورساله
انه الظل يبجي مكتوبه ودمع عينه اعله حاله
انه الضايع شبابه
حلاة الحب عذابه
الك ذكره ورساله .. الك ذكره ورساله
_____
حسب توقيت المشاعر واگف ودمعي يصب
وانه يم كل حرف بسمك عاگد السان الگلب
انه خايف ما اشوفك وارجع بنص الدرب
وغرگ بجرفين هجرك والرسايل تنشرب
دليني وينك وانه اجي لو ما الك جيه
ارحم گلب عاشگ بجه الفرگاك ليليه
مر بيه لو طارف حلم يالمهدي مر بيه
خل تكشخ عيوني ولو بعيونك شويه
اما آن الهجر يخلص يمحبوبي وغيابك
ليمته دموعي بس تكتب مواعيد اعله بابك
الفرح مسدوده بابه
حلاة الحب عذابه
الك ذكره ورساله .. الك ذكره ورساله
_____
بين الوجوه التحبك بين الوجوه الجذب
ضايع وما اعرف دربي عليك وياك انحسب
اتمدلي جفك وانه اركض وين ما صحلي ذنب
ولتهي بغيرك وعوفك وانه عود اسمي المحب
سامحني ندمان بكثر ما عذبت گلبك
يوميه اخط اسمك جذب بعيوني وبدربك
ما عدهه ذرة مستحه جفين التكتبك
بس عندي يالمهدي گلب متعلگ بحبك
يگولون اليحب يتعب وگللهم بدايه
انه العاشگ انه المغرم الى ما لا نهايه
انه اليوجع مصابه
حلاة الحب عذابه
الك ذكره ورساله .. الك ذكره ورساله
_____
في طوى گالوا حبيبك وانه احس دربي انطوه
وين ما عند الله ديره وين ما صحلي هوه
عيوني گبل اجدامي تركض عاشگ وگلبه انجوه
يمته افك شباج حزني وتترس عيوني ضوه
شمتاني خلك ما يرد گالولي شمتاني
لا يبقه گلبك ينتظر دور عشگ ثاني
وانه اعله طاري اسمك افز وافتحله ذرعاني
ويوميه ارسمك جم حلم بعيون وجداني
احبك واليحب لازم يرسمك بنتظاره
يمن بالفرگه وعيونك انه الجاويته ناره
انه المجوي بعتابه
حلاة الحب عذابه
الك ذكره ورساله .. الك ذكره ورساله
_____
بدفتر العشاگ ادور اسمي ما بين الخلگ
بلكت الله ونظره منك لل على غيابك شهگ
هاك اخذني وشوف گلبي بنار المتانه احترگ
حته ما احب شخص غيرك گلبي شديته بعلگ
جم باجر عليه يمر وانه بأمل باجر
من الجمعه للجمعه انتظر من عاشر العاشر
يوجعني كلشي بغيبتك حته الهوه العابر
مرخوص يا ذاك الدمع لعيون المسافر
ادور عنك ورايد تغطيني بحنانك
تعال اليا وكت تبقه وتظل صاحب زمانك
يمن طول غيابه
حلاة الحب عذابه
الك ذكره ورساله .. الك ذكره ورساله
_____
من ضجيج الدنيه اخذني العالم الحب سيدي
خايف تهب ريح هجرك وابقه تالي الوحدي
على لوح الفرگه ارسم صوره وقرالك حدي
ويمها ردت اكتب احبك بس حرت بيش ابتدي
من ياهي اسولف وبتدي من ياهي دليني
بجلمة الوينك خلصت كل عمري وسنيني
يالغالي شو طال الهجر ما بينك وبيني
وغمضت عيني ودمعتي ما وگفت بعيني
ضعت لو ما ضوه عيونك يدليني اعله دربك
وانه ذاك الگبل كاتب يمدري شگد احبك
ضعت والدنيه غابه
حلاة الحب عذابه
الك ذكره ورساله .. الك ذكره ورساله
_____
